Մետեորան Հունաստանի խոշորագույն վանական համալիրներից մեկն է, որը հայտնի է դարձել առաջին հերթին ահռելի ժայռաբեկորների գագաթին տեղկայված լինելու պատճառով: Վանական համալիրը հիմնադրվել է 10-րդ դարում և այդ ժամանակներից գործում է անդադար: 1988 թվականին վանքերը ներառվել են ՅՈՒՆԵՍԿՈ-ի համաշխարհային ժառանգության ցանկի մեջ:
Մետեորա վանական համալիրների շարքը գտնվում է Թեսալիայի լեռներում, Աթենքից 360 կմ դեպի հյուսիս, Կալամբակա քաղաքից 1-2 կմ դեպի հյուսիս և Տրիկալայի շրջանից ու քաղաքից 21 կմ դեպի հյուսիս-արևմուտք:
Վեց ուղղափառ վանական համալիրնըերը տեղակայված են հսկայական ժայռերի գագաթներին, որոնք ունեն ծովի մակարդակից 600 մ բարձրություն և համարվում են եզակի երկրաբանական երևույթ: Նրանք գոյացել են 60 մլն տարի առաջ և հարթավայրի տեղում գտնվող նախապատմական ծովի քարքարոտ հատակն են հանդիսացել: Ջրի, քամու և ջերմաստիճանների տատանումների արդյունքում դրանք վերածվել են հսկայական, կարծես թե օդում կախված քարե սյուների, որոնք ստացել են Մետեորա անվանումը, որ թարգմանաբար նշանակում է «օդում ճախրող»:
Ավանդությունը պատմում է, որ առաջին ճգնավորները 10-րդ դարում բարձրացել են քարքարոտ և անհասանելի, կյանքից կտրված այդ ժայռերի վրա, ապրել քարանձավներում և ժայռային խորացումներում, ապա 11-13-րդ դարերում մոտակայքում հիմնել ոչ մեծ տարածքներ, այսպես կոչված «աղոթատեղեր»՝ աղոթելու և հոգևոր տեքստեր ուսումնասիրելու համար: Ահռելի ժայռաբեկորների վրա կառուցվել են 21 վանական համալիրներ, որոնք նաև պաշտպանական նշանակություն են ունեցել հետագա դարերում խաչակիրների, ալբանացիների, թուրք- սելջուկների հարձակումների ժամանակ: Այսօր 21 վանական համալիրներից մնացել է վեցը, որոնցից գործող է միայն չորսը՝ Սուրբ Վառլաամի, Սուրբ Նիկոլասի, Սուրբ Վարվառայի և էլի մի վանական համալիր:
Մետեորան զբոսաշրջիկների այցելությամբ Հունաստանի սիրված վայրերից մեկն է, եթե չասենք ամենասիրվածը: Այստեղ են նկարահանվել նշանավոր Ջեյմս Բոնդի ֆիլմերի մի քանի սերիաները: Լուսանկարներում Սուրբ Վառլաամի վանական համալիրն է:
Լուսանկարները՝ իմ անձնական արխիվից:
Թամար Ղահրամանյան 