Մկրտիչ Պեշիկթաշյանի մասին Նարինե Թուխիկյանի «Խոստովանություն» հաղորդաշարը դիտելուց հետո մեծ տպավորություններով եկա դասի: Հաղորդաշարի դիտելը ուներ իր շարժառիթը. մենք ՝քոլեջի ուսանողներս, ‹‹Մկրտիչ Պեշիկթաշյան›› նախագիծ ենք իրականացնում: Հայոց լեզվի դասին պատվելի Թամարը մեզ համար մեծ անակնկալ էր պատրաստել, իր հետ բերելով Վաչե Սաֆարյանի մենագրությունը Մ. Պեշիկթաշյանի մասին:
Անակնկալները շարունակվում էին իրար հետևից: Գիրքը կարդալու ընթացքում պարզվեց, որ այն խմբագրել է մեծ բանաստեղծը՝ Պարույր Սևակը: Այնուհետև հայտնաբերեցինք, որ գրքի տիտղոսաթերթին ներկայացվող գծանկարի հեղինակը 20-րդ դարի մյուս մեծությունն է՝ Մինաս Ավետիսյանը: Մենք ավելի շատ ոգևորվեցինք, քանի որ մեզանից յուրաքաչյուրը իր համար նոր բաներ սկսեց բացահայտել Մկրտիչ Պեշիկթաշյան մարդու, բանաստեղծի և մանկավարժի մասին: Այդ դասին մենք բացահայտեցինք մի կերպար, որը համարձակ էր՝ իր արտաքինի բարդույթներից տառապելով և միաժամանակ երջանիկ, քանի որ սիրում էր իր աշակերտուհուն՝Սրբուհի Տյուսաբին, և հուսով էր, որ այդ սերը կդառնար փոխադարձ, ինչը, ցավոք, այդպես չէր:
Նա խիզախ էր, տղամարդկային, միաժամանակ՝ փխրուն և նուրբ: Այն սերը, հանուն որի նա ապրում էր, այլևս չկար, ու հենց այդ սիրո վախճանը սպանեց հայտնի բանաստեղծին և գործչին, և թողեց այս գեղեցիկ նկարը, որտեղ մեծ նկարիչը՝ Մինաս Ավետիսյանը, ներկայացրել է ոչ միայն նրա համեստ արտաքինը, այլ այն ամբողջ հակասական զգացմունքները, որոնք իշխում էին Պեշիկթաշլյանի մեջ: Ես համոզված եմ, որ բացի այդ նկարից, ես ինձ համար դեռ շատ բաներ կբացահայտեմ նրա մասին:
Անի Հարությունյան,քոլեջ
Թամար Ղահրամանյան 