2012-13 ուստարում կրթահամալիրում ուսումնական աշխատանքի ամենագործուն ձևը իրավամբ կարելի է համարել ուսումնական նախագիծը: Յուրաքանչյուր ուսումնական նախագիծ, ինչպիսին էլ որ այն լինի՝ ճամփորդական, էկոլոգիական, թե ճանաչողական, միտված է մի գլխավոր նպատակի՝ ավելի շատ սովորողներ ներառելու ստեղծագործական–հետազոտական աշխատանքի մեջ, խթանելու նրանց մտավոր և ֆիզիկական ունակությունները, հմտություններն ու կարողությունները: Նախագծերի շարունակական բնույթը հնարավորություն է տալիս՝ սովորողին մղելու որոնողական, վերլուծական ու համադրական տարաբնույթ աշխատանքների, որոնք, անպայման, խթանում են նրա մեջ սովորելու, յուրացնելու, դիդակտիկ կերպով գիտելիքը ամբարելու գործընթացը՝ ոչ ավանդական ուսուցման մեթոդներով:
Դասագրքային սահմանափակ գիտելիքները այսօրվա ինֆորմացված սովորողի համար հաճախ անբավարար են տարաբնույթ նախագծերի իրականացման համար: Կենդանի խոսքը, իրական, ճանաչողական ճամփորդությունը, համացանցն ու բազմաթիվ սոցցանցերում եղած ամենատարբեր տեղեկատվությունը գալիս են լրացնելու դասագրքային սահմանափակության պակասը, և դասագրքի նյութը սերտող սովորական աշակերտը վերափոխվում է՝ դառնալով հետազոտող, ստեղծական աշխատանք իրականացնող անհատ: Ցանկացած նախագծի շարունակական բնույթն, անշուշտ, հրաշալի առիթ է նաև սովորող-դասավանդող կապը ամրապնդելու համար, ավագի և կրտսերի փոխհարաբերության վերածելու, ինչպես նաև ուսուցիչ-աշակերտ ավանդական չոր, պաշտոնական փոխհարաբերությունից ձերբազատվելու համար: Բոլորդ կհաստատեք, որ ուսումնական ճամփորդության ընթացքում դասավանդողն ավելի հեշտ ու արդյունավետ է կարողանում գիտելիքը սովորողի սեփականությունը դարձնել, դժվարին ճանապարհ կամ բարձունք հաղթահարելիս վերանում են տարիքային բոլոր անջրպետները ու հաղթում է համերաշխությունը, իսկական ընկերությունը, ջերմությունն ու հոգատարությունը: ‹‹Վահան Տերյան›› նախագծի շրջանակներում Գանձա կատաարած մեր քառօրյա ճամփորդության արդյունքում թե’ մասնակից սովորողների և թե’ մեր՝ ուսուցիչներիս ամենամեծ ձեռքբերումը հենց այդ ջերմությունն էր ու փոխադարձ վստահությունը: http://www.mskh.am/am/24291, http://lusastx.mskh.am/?p=2085 :
Ուսումնական նախագիծ իրականացնելիս աշխատելով կրթահամալիրի տարբեր օղակներում (միջին, ավագ, մանկավարժական քոլեջ)՝ հաշվի եմ առել այն հանգամանքը, որ գործ ունեմ սովորողների տարբեր տարիքային խմբերի և ուսանողների հետ, ուստի փորձել եմ կոորդինացնել նախագծային աշխատանքները՝ըստ սովորողների տարիքային առանձնահատկությունների՝ ավելի շատ մասնակիցներ ընգրկելով: Այսպես՝ եթե միջին դպրոցում ըստ նախագծի՝ ուսումնասիրել, սովորել ենք Տերյանի առանձին բանաստեղծություններ և ուսումնական նյութեր, օլիմպիական առաջադրանքներ իրականացրել, ապա ավագ դպրոցում հասցրել ենք ուսումնասիրել բանաստեղծի ‹‹Մթնշաղի անուրջներ›› և ‹‹Երկիր Նաիրի›› շարքերը, գրել ռեֆերատներ, առանձին վերլուծություններ արել, անդրադարձել Տերյանի՝ որպես հասարակական-պետական գործչի կերպարին: Դե իսկ մանկավարժական քոլեջի ուսանողների հետ տարվել ենք Տերյան բանաստեղծի ու մարդու այնքա՜ն հետաքրքիր նամակներով՝ ապրումակցելով նրա հույզերին ու զգացնունքներին http://www.mskh.am/am/29160 և բանաստեղծի կյանքից ու կենսագրությունից մեզ համար անհրաժեշտ բացահայտումներ արել:
Այս օրերին ես իմ դասարաններում աշխատում եմ ‹‹Էրգիր›› http://mijin.mskh.am/8212, http://mijin.mskh.am/8165, http://mijin.mskh.am/8156, http://mijin.mskh.am/8118, http://mijin.mskh.am/8192, http://mijin.mskh.am/8193, http://mijin.mskh.am/8191 և ‹‹Մեծարենցը արևմտահայերենի ուսուցիչ›› նախագծերի վրա http://mijin.mskh.am/8254: Նախագծից նախագիծ անցնելով՝ ուրախությամբ եմ արձանագրում, որ ինքս էլ՝ իբրև դասավանդող, սովորում եմ, հետազոտում, փոքրիկ հայտնություններ անում: Ասել է թե ստեղծական աշխատանքն անվերջ է, ձեռքբերումներով ու հետաքրքիր բացահայտումներով լի:
Դասավանդող՝ Թամար Ղահրամանյան
Թամար Ղահրամանյան 